A ponte medieval do Castelo que forma parte tamén da Ruta da Encomenda recuperouse cunha axuda de máis de 32.000€ (32.145 €) do Plan de Sostibilidade da Ribeira Sacra do Consorcio de Turismo. A deterioración do pavimento obrigou a reconstruír 45 m2 a base de canto rodado con morteiro en seco, adaptando o novo ao xa existente. Polos vestixios aínda visibles sabíase que esta ponte de orixe medieval, tiña un peto de protección nas beiras (de 75 cm de alto e 50 cm de espesor) para evitar caer o baleiro, realizado en cachotería a base de lousa. Este muro de protección foi preciso reconstruílo na súa totalidade, respectando os vestixios existentes.

As obras de recuperación da ponte rematáronse coa limpeza da pedra e a contorna retirando vexetación invasiva na zona da ponte. Esta infraestrutura, que forma parte do camiño de entrada a Galicia seguindo o curso do río Sil, hoxe Camiño de Inverno a Compostela, foi realizada con fábrica de xisto. Consta dun van e arco central dun único punto, cunha altura de 8 m., ancho de 3.75 m. e unha lonxitude de máis de 15 m.

Con actuacións como esta téntase “revalorizar os recursos turísticos existentes no municipio como instrumento de crecemento económico.”