A recollida de residuos sólidos con destino aos Puntos Limpos non funciona de igual xeito en todos os concellos do sur de Lugo. Hai algúns que teñen servizo de recollida e depósito de balde, mentres que outros cobran taxas por ambas prestacións municipais.
O Concello da Pobra do Brollón vén de anunciar que, de xeito escalonado e por diferentes parroquias, realizará un servizo extraordinario e gratuíto de recollida a domicilio de residuos.
Para solicitar a recollida, a veciñanza debe chamar ao teléfono 982 430001 de luns a venres de 9:00 a 13:00 h. indicando o nome, teléfono, enderezo, cantidade e natureza dos refugallos a recoller. A continuación, e dende o concello, poñeranse en contacto para indicar a data e hora aproximada de recollida para que poidan depositar os residuos fóra das casas.
RESIDUOS QUE SE RECOLLERÁN
Con este servizo recolleranse mobles, electrodomésticos, aparellos eléctricos e electrónicos e outros residuos voluminosos que polo seu tamaño non podan ser depositados nos colectores municipais.
Pola contra, non se recollerá entullo de obras domiciliarias, nin residuos considerados perigosos segundo a normativa que corresponda.
Dende o Concello da Pobra do Brollón piden á veciñanza a máxima colaboración para manter o concello limpo evitando o depósito de calquera residuo en lugares non permitidos polo gran impacto ambiental negativo que supón tanto polo grave deterioro paisaxístico como pola contaminación dos solos.
O servizo comeza a funcionar o vindeiro 13 de abril cubrindo as seguintes poboacións: Santo Adrián, Saa, A Veneira, Forgas, Covadelas, Castrosante, Ferreiros, A Ferreirúa, Pacios de Veiga e Viduedo.
En vindeiras datas, 20 e 27 de abril, e 4 de maio, o servizo darase a outros núcleos rurais segundo se pode consultar na páxina web do concello.
