A Deputación de Lugo abriu este luns 10 de abril o prazo para inscribirse nas actividades gratuítas do programa Actívate, unha inciativa que a institución provincial desenvolve por terceiro ano consecutivo para promover o turismo activo, deportivo e de aventura nos concellos da provincia.

As persoas interesadas en participar poden anotarse cubrindo o formulario de inscrición que estará dispoñible na páxina web inscricions.deputacionlugo.org e na de turismo.deputacionlugo.gal

A programación arrincará este 15 de abril en varios concellos da provincia. No sur de Lugo haberá dúas actividades programadas para a fin de semana. En Chantada está programada para o sábado 15 unha ruta BTT e kaiak polo río, mentres que o domingo 16 os e as participantes poderán elixir entre paddle surf ou kaiak para realizar unha ruta polo río Sil, en Monforte de Lemos.

As inscricións para as vindeiras actividades abriranse progresivamente todos os venres, ás 8 da mañá, cunha semana de antelación ao día de celebración de cada proposta.

O Actívate chegará nesta terceira edición a 18 concellos da provincia durante as fins de semana dos meses de abril e maio. A programación inclúe desde propostas deportivas para os máis atrevidos cun nivel medio-alto de dificultade, como un raid de aventura, surf, kaiak no mar, escalada ou barranquismo, ata iniciativas de dificultade media-baixa, como pode ser o cicloturismo histórico, o paintball ou a iniciación á equitación. Nesta ocasión contará cun total de 300 prazas, entre 15 e 20 por actividade.

Durante a xornada, os participantes contarán cos materiais e equipamento necesario para levar a cabo a actividade, cun guía ou monitor especializado, e un seguro de responsabilidade civil e de accidentes.

OUTRAS DATAS E ACTIVIDADES PARA ABRIL E MAIO

Para o 30 de abril haberá Escalada I e II na aldea de Visuña, no Concello de Folgoso do Courel; e pola tarde iniciación á equitación, en Taboada.

O 13 de maio está programada unha actividade de Barranquismo no Concello de Quiroga.