O parque infantil da Compañía, que foi completamente renovado a principios do ano 2021, presenta unha serie de deficiencias no piso de caucho, que non son xustificables polo escaso período de tempo transcorrido dende a súa colocación.
Esta circunstancia foi a que ocasionou a intervención do Alcalde para requirir á empresa responsable das obras de ampliación e mellora do mesmo, e que se fixese unha análise da situación que concluíu cun informe no que se determina que o deterioro está ocasionado pola colocación dunha partida defectuosa de caucho.
Ante esta información, o Equipo de Goberno procedeu a requirir á empresa para que levantase o piso defectuoso e volvese a colocar un caucho novo, que garantice que o parque estea en condicións óptimas para ser usado pola xente en xeral e polos pequenos en particular.
A renovación do piso vaise levar a cabo a semana que vai do 17 ao 21 de abril, período no que permanecerá pechado aos usuarios e usuarias para garantir a seguridade dos nenos e nenas. A empresa comunicou que lamenta os prexuízos ocasionados e asume a reparación dos desperfectos.
