As proba correranse sobre un circuíto de asfalto e sendeiros de terra de cinco quilómetros de lonxitude, mesturando zona urbana e natureza, e con apenas desnivel. A saída situarase no bulevar da rúa da Liberdade, á altura de Catro Camiños en dirección a Samos, para despois xirar á dereita pola rúa Castelao e, no cuartel da Garda Civil, seguir cara Ponte das Aceas, para logo volver pola zona do campo de fútbol ata a estrada de Monforte. Desde alí, voltarase de novo á rúa Castelao, seguirase cara ao pavillón, a piscina e cruzarase a zona do Hotel Alfonso IX ata atopar a meta no Malecón.

A recollida de dorsais será no Malecón do río Sarria, de 16:00 a 17:30h. e a organización disporá dunha carpa na zona de entrega de dorsais e camiseta conmemorativa para os 500 primeiros inscritos, asi como avituallamento líquido ao remate das probas.

Pechado o proceso de inscrición dende o pasado 17 de abril, na carreira apuntáronse 206 persoas e na andaina 342. Dende o concello, malia a predición de Meteogalicia que dá algo de auga, esperan que a participación non se resinta e animan “agardan a todo o mundo”.