Este sábado, 29 de abril, ás 20:00 h. o BNG de Quiroga organiza un acto público no Centro Social de Campos de Vila para coñecer máis ao detalle temas que interesan aos propietarios e propietarias de fincas. Neste caso tratarase o tema do catastro e as limpezas de fincas da man do avogado, Miguel Vieito Villar.
“Quen non ten, tivo e terá problemas co catastro e as limpezas de fincas en Quiroga?”, pregúntase o BNG de Quiroga. Así este acto informativo pretende dar a coñecer os aspectos máis importantes do catastro e das limpezas obrigatorias de terreos para a prevención de lumes, saber as obrigas e dereitos que contemplan as normativas aplicables e escoitar á veciñanza para resolver dúbidas que se presenten. A presentación será a cargo de Xosé Manuel Fernández, concelleiro e candidato á alcaldía nas eleccións municipais do vindeiro 28 de maio, quen tamén fará de moderador no coloquio final do acto.
Miguel Vieito é avogado e está especializado en tres áreas: Dereito e saúde, levando neglixencias e erros médicos, danos en saúde e negación de servizos, entre outros temas; Dereito e discriminacións por razón de idade, de lingua, de orientación ou identidade sexual… e tamén Dereito e relacións familiares intervindo en mediación, herdanzas, separacións ou divorcios; así como xestión patrimonial, levando temas de Catastro, Rexistro da Propiedade, lindeiros, limpezas de fincas, etc.
