O Courel, destino e futuro ofrece 25 prazas para anotarse en cursos de 10 horas de duración –en modalidade de Teleformación– sobre temas aplicables á xestión comercial, á calidade de servizo ao cliente, á tesourería, a Internet, a técnicas de venda, a envases e embalaxes, a finanzas, a marketing dixital, a medios de pago, ou a control de almacén.
A formación, que terá lugar entre o 30 de maio e o 30 de xuño, está dirixida a autónomos, directivos e traballadores de Pemes de calquera sector (comercio, hostalería, servizos, talleres, viños…) dos concellos de Ribas de Sil, Folgoso do Courel e Quiroga. Os cursos que se presentan están estruturados en micro pílulas formativas aplicables a tarefas propias da súa actividade económica como as devanditas.
Son 20 cursos para elixir o que sexa máis conveniente para o participante e permítese inscribirse nun ou máis, pero respectando a orde de inscrición para asignar as prazas.
Na súa web pódense ver as actividades formativas completas e formalizar a inscrición. E tamén se pode pedir información e pedir a reserva de praza enviando un correo electrónico a desarrollo@ocoureldestinoyfuturo.es
O COUREL, DESTINO E FUTURO
Trátase dun proxecto que ten como obxectivo afrontar o reto demográfico do medio rural de Galicia e está centrado no sur da provincia de Lugo, concretamente nos concellos de Quiroga, Folgoso do Courel e Ribas de Sil.
Conta coa iniciativa da Consultora NOA INNOVA e está enmarcado nos ‘Planes del Reto Demográfico del MITECO’ para desenvolver diferentes actuacións encamiñadas a poñer en valor as potencialidades do territorio e atraer tanto a novos habitantes e empresas como a fixar poboación nos tres concellos referidos que conforman o Xeparque Mundial da Unesco Montañas do Courel.
O proxecto conta cos seguintes socios: Casa de Outeiro, URBA (Consultora de Urbanismo e Arquitectura), Coureleando e Sabor Rural Galicia; e como colaboradores: Axencia Galega de Turismo, Xunta de Galicia, Campus Terra (USC), Abanca, Confederación de Empresarios de Lugo (CEL), Fundación CEL e Fundación Agroalimentaria Galega (FAGA).
