Raizames é unha iniciativa impulsada pola Asociación de Comerciantes e Industriais do Municipio de Taboada (ACIMTA) que busca ser unha proposta diferenciadora, dentro do contexto das festas e feiras do viño.
Esta iniciativa ten como obxectivo presentar un modelo que procura a responsabilidade co entorno, no que prima a calidade sobre a cantidade, que fuxe de aglomeracións e que se materializa baixo unha diversificada programación cultural: faladoiros, paneis de experiencias, videoforums, roteiro, encontro de adegas da zona, encontro de mulleres do sector, viños contados por voces expertas e numerosas intervencións artísticas.
O primeiro Encontro da Cultura do Viño coloca o enfoque nas persoas. Establécese unha liña de comunicación e colaboración co tecido social e cultural da contorna; con persoas ou asociacións veciñais e parroquiais que están desenvolvendo iniciativas de preservación, coidado e difusión do patrimonio, que colocan a mirada sobre a especificidade do territorio e a paisaxe, e que contribúen a desenvolver posibilidades e novas maneiras de habitar un rural vivo, participativo e en benestar.
PRESENTACIÓN DA PROPOSTA
A programación está dirixida a todo tipo de públicos e constitúe Taboada como epicentro de confluencia entre habitantes e foráneos, entre profesionais do sector do viño e aficionados, entre a mocidade e a xente vella, entre produtores e consumidores.
Raizames é a celebración da cultura do viño, que se traslada a través dun cruce de miradas artísticas, lúdicas, formativas e ata etnográficas, ao longo das diferentes accións programadas: a música, a danza, a poesía, ou a narración oral entrelazadas coas catas, as visitas a viñas ou adegas.
Raizames programa en feminino, con especial atención en contar con artistas, axentes locais, técnicas, sumilleres, enólogas, viticultoras e docentes, mulleres. Búscase a mirada femenina, a perspectiva equilibrada sobre a realidade e posibilidades da Ribeira Sacra, sen sesgos.
O Encontro desenvolverase en diferentes puntos do concello de Taboada, sendo a Praza de Riazón o punto de encontro central onde estará o ‘Espazo Viño’ con sesións temáticas e degustación de viños para o público asistente. Haberá tamén encontros na Casa da Cultura, un roteiro polas parroquias de ribeira e accións no Pazo de San Pedro de Bembibre.
En palabras dos organizadores, “Raizames preséntase como unha folla en branco, sobre a que se escribe por vez primeira en formato Encontro a riqueza lingüística, a tradición oral, o legado histórico, os saberes específicos da Ribeira, as maneiras de celebrar, os sentires identitarios da comunidade. Mostra o territorio dende o prisma de quen lle deu forma”.
O proxecto está apoiado pola Xunta de Galicia, Turismo de Galicia, Axencia de Turismo de Galicia, Vicepresidencia da Deputación de Lugo –Cultura— Deputación de Lugo –Turismo–, Consellería de Promoción do Emprego e Igualdade e Concello de Taboada.
Tamén colaboran: A túa Xanela, Fundación Condado de Taboada e Caixa Rural Galega.
