Segundo o secretario comarcal da CIG-Servizos, Xoán Díaz, “aínda que a patronal (Gadis e Froiz) alega que os incrementos salariais que ofrece son maiores que os formulados noutras provincias “estes seguen a ser insuficientes porque partimos dunha situación moi inferior. Coa proposta empresarial, as táboas de todas as categorías profesionais por debaixo do grupo 3 continuarían estando no límite do SMI”.
Segundo comunican á prensa, na última reunión da mesa a patronal propuxo un incremento do 5% para o ano 2022, cunha paga única en concepto de atrasos de 780€ (231€ menos do que correspondería), unha suba do 4% para 2023, do 3,5% para 2025 e do 3,25% para o ano 2025. Ademais, néganse a incluír unha cláusula de revisión que opere ano a ano con referencia no IPC real e o único que propoñen é unha revisión a final de convenio, mais sen efecto retroactivo e sen dar lugar ao cobro de atrasos.
“Para nós esta oferta resulta insuficiente porque non permite recuperar nin garantir o mantemento do poder adquisitivo dos salarios, nun sector ademais que dende o inicio da pandemia e no actual contexto de prezos disparados está obtendo beneficios históricos”, subliña Díaz.
BENEFICIOS DO SECTOR
O sindicato convocante da folga critica a falta de xustiza e xenerosidade na negociación coa patronal, pois entenden que non se está a valorar o esforzo das traballadoras e traballadores “que permitiron que as compañías de distribución acadaran estas millonarias ganancias”.
“Imos loitar por un convenio digno. Seguimos a reclamar incrementos salariais do 6,5% para 2022 e do 5,7% para 2023 para poder reverter o empobrecemento dos últimos dous anos; e unha cláusula de revisión salarial ao IPC real e con carácter retroactivo para garantir que non haxa perda do poder adquisitivo no futuro; así como demandamos o cobro do complemento de IT até o 100% da base de cotización”, sinalan con determinación.
Xoán Díaz sinala tamén que moitas das melloras foron asumidas pola patronal e estanse aplicando no convenio sectorial da Coruña polo que “as traballadoras e traballadores da provincia de Lugo non van pasar por menos”. Finalmente, o secretario comarcal lembra que a CIG-Servizos convidou ao resto de organizacións sindicais con presenza na mesa a que se sumen á convocatoria pois “foi un mandato saído das asembleas de persoal”.
