O Diario Oficial de Galicia (DOG) publicou a orde pola que se adopta decisión favorable en relación coa solicitude de rexistro da modificación do prego de condicións da Denominación de Orixe protexida Ribeira Sacra.
Entre as novidades máis salientables atopamos as novas denominacións de viños de garda e barrica, así como a posibilidade de producir rosados amparados por esta Denominación de Orixe.
Tamén se inclúen a regulación dos depósitos e tempos mínimo autorizados para a crianza dos caldos amparados, contemplando materiais como a madeira ou o formigón. Trátase de por en valor elaboracións que se levan a cabo en recipientes de madeira que pola capacidade non entrarían na denominación “barrica” e tamén o uso de depósitos de cemento ou outros materiais. Este tipo de elaboracións véñense realizando desde hai uns 15 anos e son prácticas similares ás que se empregaban outrora, cando aínda non chegara o aceiro ás adegas. Con esta regulación xa se poden comercializar viños coa mención “garda”, para que tamén se distingan no mercado.
Nesta orde aproveitouse para modificar os requisitos para os viños que levan a mención “súmmun”. Só será preciso que estean elaborados cun 85% de uva das variedades consideradas principais, sen obrigar a que a Mencía represente o 60% do total, como ata o de agora.
No que se refire a castes autóctonas, a Tempranillo pasa a ter a categoría de autorizada e engádense as castes de uva branca, branco lexítimo e caíño branco. O branco lexítimo vai a aportar o seu carácter terpénico e o caíño branco enriquecerá en matices as elaboracións. No caso das tintas incorpóranse tres: gran negro, caíño longo e caíño bravo.
Outra das novidades proposta é o pequeno axuste que se fai no que se refire aos rendementos , permitindo obter 69 litros a partir de 100 kg de uva, fronte aos 67 anteriores, que son parámetros que permiten obter viños da calidade coas moderna técnicas de prensado.
As zonas de produción e elaboración autorizadas e amparadas por esta DO mantéñense practicamente inalteradas agás algúns pequenos núcleos como o de Fontao, na Teixeira, e Fión, no Saviñao, nas que historicamente se vén cultivando viñedo.
En referencia á elaboración de viño, amplíase a zona ás parroquias de Gundivós (municipio de Sober) e Boazo (municipio da Teixeira). Estes cambios débense a axustes na delimitación territorial das parroquias xa existentes.
