Aseguran desde Pladesapu, que despois do fallo do día 23 na rede de subministración eléctrica producíronse avarías importantes en diferentes aparatos electrónicos, que impediron a realización de moitos dos servicios que diariamente se realizan. “Tiveron que derivarse os controis de sintrom ao hospital (sobre unhas 60 persoas) e moitas analíticas, provocando o desprazamento de moitos usuarios; o ascensor non funcionou , as neveiras estropeadas arriscando a viabilidade das vacinas que deben estar a unha temperatura en concreto, ordenadores que non funcionan, citas que non se poden dar, chamadas sen recibir, etc”, afirman desde a Plataforma.
A situación provocou retrasos na atención e o enfado de quen non foi atendido correctamente, “O máis vergoñoso é que despois dunha fin de semana e case unha semana completa, este 29 de xuño seguía sen solucionarse o problema. Só foi valorado por un informatico e colocado un dispositivo de control de tensión eléctrica ademais dalgún ordenador arranxado, pero seguen sen solucionarse problemas como o ascesor para persoas con mobilidade reducida e os cortes de luz son constantes impedindo o funcionamento normal do Centro de Saúde.”
Consideran desde Pladesapu que isto demostra a despreocupación dos responsables do sistema sanitario para manter as instalacións e a axilidade do servizo e esixen solucións, “Esiximos con premura a resolución de todos estes problemas e a implicación directa no mantemento dos centros de saúde de toda a zona sur que ademais da falta de persoal, agora teñen que facer fronte á falta de revision das súas instalacións e do material que se manexa.”
Súmase a esta denuncia, Esperta Monforte, “A situación amosa unha absoluta deixadez de falta de vontade por facer nada por parte da administración. Non é de recibo que nun centro de saúde se deixara pasar unha fin de semana sen facer unha reparación adecuada da electricidade e demáis sistemas informáticos para poder dar servicio aos pacientes. Sinalan que neste centro traballa a actual concelleira de Sanidade de Monforte de Lemos, “polo que coñecían a situación e dende o noso Concello non manifestaron ningunha preocupación nin se realizou ningunha publicación nin información ao respecto nin na súa páxina web nin en redes sociais.”
