O PP de Monforte de Lemos solicitou dúas veces a documentación do expediente da praia fluvial ao concello de Monforte. Coa última solicitude, os populares aseguran que o alcalde sinalou que “non existe tal expediente porque as actuacións realizadas por esta alcaldía, das que se informou á cidadanía, polos medios de comunicación, son actuacións preparatorias que, ata este momento, non deron lugar a iniciación dun procedemento administrativo”.

“Este escrito de resposta á nosa solicitude indícanos claramente que foi outro acto de propaganda do alcalde, que ademais, bordeando a ilegalidade, fixo un anuncio de campaña utilizando as instalacións municipais. O peor é que enganou aos cidadáns de Monforte facéndolles crer que tiña todo preparado para crear unha praia fluvial, cando realmente non hai nada, so ideas na súa cabeza”, afirma Varela.

Os populares demandan máis transparencia coa cidadanía e insisten en que o goberno municipal debería atender outras prioridades, “Monforte ten un claro problema coa auga que incide no seu saneamento e o primordial é solucionalo para poder gozar despois desas zonas de baño tan desexadas entre os cidadáns”.