O concello de Quiroga a través da área de Cultura e Festexos, impulsa esta iniciativa co desexo de darlle continuidade en vindeiros anos e co obxectivo de traer a Quiroga propostas musicais e folclóricas que visibilicen e divulguen a riqueza do patrimonio cultural.
Deste xeito, o 12 de agosto, a partir das 12:00 h. contarase co grupo de Música e Baile tradicional “A Volta do Agro”, formación que chega grazas ao programa “Tradigalu” da Área de Cultura da Vicepresidencia da Deputación de Lugo; e pola noite, ás 23:00, un concerto a cargo do Grupo Tradicional “Os Melidaos”.
Estes últimos chegan dentro do programa que impulsa tamén a Área de Cultura da Vicepresidencia da Deputación de Lugo, “Xunt@s polo Serán 2023”. O Obradoiro de Cultura Tradicional A Volta do Agro nace no ano 1995 na cidade de Lugo coa idea de traballar no obxectivo último da asociación, a dignificación da cultura tradicional galega. “A música tradicional é un tesouro que compre conservar” é a máxima coa que Os Melidaos veñen camiñando desde os seus inicios no ano 2001 na música tradicional, outorgándolle á gaita e á voz un papel protagonista. Concertos, alboradas, seráns, catro discos propios publicados e algunha colaboración en traballos alleos, forman xa parte da súa historia.
Os Melidaos
