Dous mozos de 18 anos morreron e un terceiro, o condutor, saíu ileso nunha saída de vía ocorrida pasada a medianoite en Chantada. Segundo relataba un dos primeiros alertantes e confirma a Garda Civil, o accidente foi provocado por un xabaril que cruzou a estrada.

Segundo informan o 112 e o Instituto Armado, o turismo saíu pola marxe dereita da calzada e chocou contra a barreira de seguridade no punto quilométrico 53 da N-540. Mentres que o que manexaba o vehículo resultou ileso, os bombeiros tiveron que excarcerar ás dúas vítimas mortais, que viaxaban no asento do copiloto e na parte de atrás.

O 112 tivo constancia do ocorrido ao fío das 00,15 horas, cando varios particulares chamaban á central de emerxencias para solicitar axuda para os ocupantes do coche, que estaban atrapados. Así, de acordo cun dos alertantes, o sinistro púidose deber a un xabaril que se interceptou na calzada.

Seguidamente, os xestores do 112 solicitaron a intervención de Urxencias Sanitarias de Galicia-061, dos bombeiros de Chantada e de Garda Civil de Tráfico. Unha vez no lugar, os membros de salvamento e extinción de incendios do municipio empregaron material de excarceración para liberar a dúas dos ocupantes, sen que se puidese facer nada por salvarlles a vida. Tratábase de dous homes de 18 anos, veciños de Chantada.

O condutor, a pesar de que sufría unha crise de ansiedade, saíu ileso. Deste xeito, a central de emerxencias informou os especialistas do Grupo de Intervención Psicolóxica en Catástrofes ou Emerxencias (GIPCE) por se fose necesaria a súa atención a familiares e achegados dos falecidos. No operativo tamén participaron efectivos de Protección Civil de Chantada e persoal do servizo de mantemento das estradas. Igualmente, pasouse o aviso á Policía Local.