“Galicia vence a Napoleón. A incrible fazaña do pobo galego que en seis meses venceu e expulsou da súa terra ás tropas francesas” é un apaixonante relato fundamentado nun intenso traballo de investigación nas máis importantes fontes documentais do país e nunha extensa e documentada bibliografía.
Foi en Galicia onde se empezaron a formar as primeiras partidas de homes que, obrigados a abandonar vilas e aldeas ante a presenza do invasor, acosaron constantemente ás tropas francesas ata expulsalas destas terras.
Margarita Rodríguez Otero dedica a súa novela a estes heroes anónimos que entregaron a súa vida por defender a dignidade da súa terra. Sorpréndenos a autora cunha intelixente trama sentimental na que, por azar, – no transcurso dunha viaxe ao Monforte dos nosos días -, entrecrúzanse vellos e amargos recordos de infancia do seu protagonista, nos duros anos corenta de posguerra, co achado dun vello manuscrito, no que se describen as vivencias dun escribano recrutado como intérprete nas lexións francesas. Este manuscrito, esquecido moitos anos no faiado dunha casa en Carcasonne, describe o paso das tropas francesas por Galicia e en especial, polas terras de Lemos e, aínda sen pretendelo, convértese nunha documentada crónica dos horrores da guerra. O paso das tropas francesas por Monforte de Lemos, na primavera de 1808, deixou pegadas indelebles no patrimonio cultural e no imaxinario dos monfortinos. Margarita Rodriguez Otero lévanos polos acontecementos que fixeron de Monforte a poboación máis castigada polas tropas invasoras ao seu paso por Galicia.
