Esta pasada fin de semana comezaban as festas da capitalidade de Ribas de Sil e facíano con dúas actividades culturais que tiveron un notable éxito. Unha delas foi un ‘concerto punk infantil’ no anfiteatro da Praia Fluvial ás 20:00 h. e a outra a obra de teatro ‘Nunca é tarde para o amor’ que levou a escena o grupo de teatro afeccionado Teatro Augas do Sil no salón de actos do concello. Neste último evento cómpre destacar o cheo total e o bo traballo que desenvolveu enriba do escenario todo o elenco participante. Unha comedia de enredos familiares que fixo rir moito ao público asistente.
O domingo 13 a xornada centrouse no evento deportivo ciclista da ‘Subida a Torbeo’ que chegou á súa XXVII edición, e nunha tarde de lecer infantil con inchables e festa da escuma na Praia Fluvial. Ao remate esta última actividade houbo merenda e contos para a cativada.
DÍAS GRANDES DAS FESTAS
Para hoxe, luns 14 de agosto, está programado o evento “Rock & Viño” nunha segunda edición que nesta ocasión trasladarase á Praia Fluvial a partir das 19:00 h.
Trátase dun encontro cos viños da comarca, estando presentes as seguintes adegas: Casa de Outeiro, Lar de Ricobao, Val de Quiroga, Casa de Outeiro, EDV2015 e Atrium Vitis
O encontro vitivinícola estará acompañado da música do grupo de Gaitas O Recanto, e a partir das 19:00 h. música en directo ata a madrugada. Así, ás 19:00 h. pinchará o DJ quirogués Adri Díaz, ás 20:00 h. actuarán Os Monifates e ás 21:00 h. o dúo de versións dos clásicos do pop español, Dos en Punto.
O peche musical poñerao a banda The Cruce ás 23:00 h. e Dj Dani Daniel a partir das 2:00 h.
O martes 15 terán o seu especial protagonismo os actos relixiosos e a festa e verbena. Pola mañá fará un pasarrías Brabán Gaiteiros, e ás 12:00 h. terá lugar a procesión e a misa. Xa pola noite, verben coa orquestra Mar Azul. Chegando ao día 16 de agosto toca fin de festa cun evento gastronómico, música e fogos artificiais. Ás 21:30 h. chourizada popular, ás 22:00 h. fará o primeiro pase a orquestra Yucatán e ás 23:00 h. ofrecerá un concerto a Banda Folk de Ribas de Sil. Ás 00:30 h. serán os fogos artificiais desde o río e a continuación terá lugar o segundo pase de Yucatán.
