Durante todo o mes de agosto o centro de saúde de Chantada só conta con dous médicos sen cubrir os que están de baixa. “Non é a primeira vez que ocorre aforrando así a Xunta cartos a conta dunha pésima calidade asistencial que fai que se corran moitos riscos porque non hai maneira humana de facer diagnoses e atención de calidade sen tempo e máis en agosto cando vén moita xente demandando asistencia sanitaria”, sinalan desde Por Chantada.
Lamentan que en enfermaría a situación tamén está baixo mínimos, con tres enfermeiros xeralistas e unha de pediatría, sen cubrir unha xubilación desde hai meses e sen cubrir permisos ou ferias. Por Chantada engade, “Con este cadro tremendo, agudizado polo desmantelamento do Hospital comarcal de Monforte, cómpre perguntarse de que vale o Goberno local e o seu silencio cómplice. Segue atando o goberno local a pór as siglas do PP por diante da saúde e do benestar da veciñanza?”.
Mentres, veciños a nivel particular, puxéronse en contacto con este medio para amosar o seu malestar polo que denominan, “Corazón do abandono sanitario, ao non ser posible coller cita na web do SERGAS porque as citas están todas tomadas e sen embargo o centro está todo baleiro. É dicir, non é certo o que di o SERGAS. En Chantada non temos médicos, e como sempre, para o alcalde do PP non é un problema”. Consideran que deben denunciar “unha atención sanitaria vergoñosa como cidadáns que pagan os seus impostos e ven recortados servizos esenciais”.
Centro de saúde de Chantada / JMRP
