Un total de 12 menores de entre 6 e 12 anos participaron nos campamentos do Concello de Monforte de Lemos. Dende a Asociación Agora de Persoas con Discapacidade, entidade membro de COGAMI (Confederación Galega de Persoas con Discapacidade) felicitan ao concello pola organización destes campamentos nos que puideron participar e compartir menores con discapacidade e sen discapacidade.
O recentemente nomeado presidente de Agora, Isaac Rodríguez, traslada estas felicitacións por unha organización de campamentos “inclusivos e participativos”, segundo dixo e expresou tamén que “supoñen un paso máis no recoñecemento de dereitos nos menores con discapacidade porque as actividades de lecer e tempo libre supoñen unha importante vía de comunicación e desenvolvemento social”.
Durante o período de reserva de prazas para os campamentos, concello e asociación mantiveron unha xuntanza na que Agora trasladou aos representantes municipais a importancia de que foran inclusivos, permitindo tanto a asistencia, participación e convivencia de menores con discapacidade como sen discapacidade.
Algunha das familias destes 12 menores participantes trasladáronlle á entidade Agora a súa conformidade co desenvolvemento destes campamentos e o bo traballo dos monitores e monitoras. “Aínda que queda camiño por percorrer, imos dando pasos para conseguir un Monforte máis inclusivo, dándolle protagonismo a un colectivo como é o da discapacidade que empeza a ter máis presenza cando se organizan actividades de lecer”, expresa o Presidente da asociación Agora.
