Aseguran os socialistas que durante a época de verán, a poboación na vila do Asma multiplícase coa chegada de turistas, o que se une a unhas condicións climatolóxicas (máis calor) que requiren unha frecuencia de limpeza maior. “Os veciños e veciñas trasládannos a súa preocupación polo estado dalgunhas beirarrúas, cheas por exemplo de excrementos de paxaros”, apuntan os socialistas preocupados pola imaxe de deixadez que transmite a falta de limpeza ós turistas e polos problemas de salubridade que causa.

Dende o PSOE chantadino trasladan a necesidade de levar a cabo as tarefas de limpeza necesarias, “sen esquecer así mesmo un tratamento racional da auga que sempre se debe de manter, máis aínda na época de seca na que estamos”. Noutros concellos, para tarefas de limpeza emprégase auga non potable, para non malgastar as reservas hídricas da auga apta para o consumo.