O Concello de Monforte segue a conmemorar a Xornada Europea da Cultura Xudía con novas actividades, logo das visitas guiadas do pasado 3 de setembro. O xogo, ideado pola Red de Juderías de España, consiste en situarse diante dunha porta colocada na Oficina Municipal de Turismo (rúa Comercio 6), facer unha foto diante de dita porta e seguir as instrucións do QR impreso na porta.
Unha vez sacada a fotografía, para participar no concurso, será necesario subila a Instagram e etiquetala con #memoria #redjuderias ou enviala a descubridores@redjuderias.org. Os participantes que suban as súas fotos, optarán a conseguir diferentes premios a través do sorteo de packs de agasallos.
Escóllese esta temática porque os xudeus sefardís leváronse con eles as chaves das súas casas coa esperanza de poder regresar de novo un día a elas. Hoxe esas chaves son símbolo da memoria e vínculo entre todos eles e coa súa terra de orixe, Sefarad.
Dende o concello de Monforte animan a veciños e visitantes a participar neste concurso, e de paso aproveitar para realizar un paseo pola memoria visitando a zona de ámbito xudeu de Monforte.
