O Concello do Saviñao podería sumarse á iniciativa de contar cun polígono agroforestal que abranguería unha superficie de preto de 100 hectáreas, distribuídas en 143 parcelas duns 33 propietarios. Segundo indicou José González, conselleiro de Medio Rural, a proposta é dedicalo a gandaría en extensivo ou cultivos anuais, fundamentalmente forraxeiros.

Este futuro polígono sumaríase aos 24 que actualmente existen en distintas fases en Galicia, que supoñen a posta en valor de máis de 9.000 hectáreas distribuídas nunhas 29.000 parcelas propiedade de 7.900 veciños.

O conselleiro lembrou que esta é unha das figuras de mobilización da terra agraria, mediante a cal se recuperan grandes áreas de terra potenciando os tres usos de chan -agrícola, gandeiro ou forestal- segundo o tipo de cultivo máis acaído ou con maior tradición en cada zona.

Os polígonos agroforestais son unha ferramenta axeitada para recuperar a terra de boa capacidade produtiva que está abandonada ou infrautilizada. Dito aproveitamento faise, nestes casos, de forma sustentable creando actividade agrogandeira, fixando poboación e combatendo os incendios forestais.