O Concello do Incio oferta aulas de música e baile tradicional para pequenos/as e para maiores tendo como prazo máximo para inscribirse o 1 de outubro. As clases comezarán o día 7 dese mesmo mes.
No que respecta a modalidades e horarios e profesorado, aparte de música tradicional correrá a cargo de Daniel Fernández e as clases serán os sábados. As disciplinas que se impartirán entre as 16:15, 17:15, 18:00 e 19:30 h. son gaita e percusión, música e movemento, e acordeón. Na parte de baile, a cargo de Yolanda Álvarez, as aulas serán tamén os sábados en horario de 17:00 h. para adultos e de 18:00 h. para o alumnado de 3 a 12 anos.
O prezo por matricularse é de 10 € por actividade e mes podendo formalizar a inscrición na Casa do Concello (teléfono 982 427014).
PROFESORADO
Daniel Fernández López posúe o Grao Profesional de Música na especialidade de Gaita, o Grao Superior, de Música na especialidade de Instrumentos da Música Tradicional e Popular e o Máster Universitario en Profesorado.
É gaiteiro de Cántigas e Frores, das pandereteiras As Lagharteiras e do cuarteto Os Picurruchos e acordeonista do grupo Os Minhotos. Ten sido recoñecido como intérprete con máis dunha ducia de premios e conta con 13 anos de experiencia laboral no ensino musical.
Yolanda Álvarez Castro formouse dende os tres anos nun amplo abano de estilos de baile, combinando a aprendizaxe en escolas privadas co conservatorio de danza. Neste lugar acadou a formación en danza clásica, danza contemporánea, danza española e danza tradicional galega. Conta con máis de 25 anos de experiencia como bailarina e 15 como mestra.
