Nesta xornada combinarase o lecer das tradicións ligadas á vida rural da Serra do Courel co traballo do voluntariado. O programa comeza ás 10:30 horas co obradoiro ‘Crear comunidade’ que imparte Rexenerando S.Coop.Galega. As prazas son limitadas e pódense reservar chamando ao 657 07 58 12.

Á mesma hora haberá unha acción para eliminar piñeiros e mimosas no monte comunal. Esta actividade tamén conta con prazas limitadas, polo que para participar é preciso chamar ao 639 82 56 22. Ás 13:30 entregarase o premio colectivo á veciñanza do Courel pola súa reacción ante os lumes, que correrá a cargo da Asociación para a Defensa Ecolóxica de Galiza (Adega).

A partir das 16:30 horas, a Cooperativa Outonía encargarase de impartir un obradoiro de superación do trauma despois dos lumes. A xornada rematará con música a cargo de Col&flor a partir das 19:00 horas.

A asociación ultima tamén a elaboración dun mural colaborativo, a partir de material e técnicas vernáculas cun deseño contemporáneo, no palco da música de Vilamor. Este traballo será supervisado pola artista, Caropla Carrot. A asociación pretende que o mural sexa un símbolo do novo Courel tras a vaga de lumes que afectou á serra no verán de 2022.