O BNG explica que no centro de saúde de Bóveda levan anos sen cubrir a baixa da praza de médico titular polo que o servizo que se ven prestando é máis reducido do habitual, xa que é atendido polo médico do centro de saúde de Rubián, onde este ten a súa praza. “A situación obriga a unha itinerancia de facultativos diferentes, ata tres nunha mesma semana, cando o médico de Rubián non está dispoñible, o que vai en detrimento da necesaria e estreita confianza médico -paciente”, sinalan os nacionalistas. 

Engaden que “por un permiso do médico de Rubián, o médico substituto atende en dita localidade como establece o seu contrato, e a veciñanza de Bóveda non dispón deste servizo, derivándoa ao Centro de Saúde de Rubián.”

Dende o BNG de Bóveda denunciase a obriga do Sergas de cubrir a praza de Bóveda, e reiteran a súa preocupación ante “unha situación provisional e precaria, que corre o perigo de converterse en permanente, o que no medio e/ou longo prazo pode supoñer a perda definitiva da atención nun dos centros do municipio.”

“O problema actual non se tería dado se estivese cuberta a praza de Bóveda, algo que necesitamos pola dispersión e o avellentamento poboacional”, conclúe Javier Castro, portavoz municipal do BNG en Bóveda.