A actividade, que se desevolveu ao longo de toda a xornada, foi seguida presencialmente por unha vintena de participantes e online desde iberoamérica por varios centos de persoas vinculadas cos museos, a cultura e a educación. Traspasando deste xeito fronteiras co valor educativo da Rede Museística Provincial.
Eloísa Pérez Santos, profesora de avaliación psicolóxica da Universidade Complutense de Madrid e investigadora de públicos de museos, guiou o encontro que estivo coordinado por BenCuriosa-Implementa Cultura Accesible.
A deputada da área de cultura da Vicepresidencia da Deputación Provincial de Lugo, Iria Castro, achegouse ao encontro e a xerente da RMPL, Encarna Lago, agradeceulle a atención que fai a este tipo de accións, “Vimos de facer recentemente todo o que ten que ver con desigualdades de clase e ciclos de vida e queremos ver se estes proxectos están acadando o impacto para o que se fixeron. Tentamos mellorar día a día e agradecemos o apoio recibido desde a área de cultura”.
Pola súa banda, a deputada Iria Castro, loubou a iniciativa que dá continuidade ao encontro celebrado o pasado ano; “Como profesionais é importante seguir formándonos e chegar cada día a máis público, o que adquire unha relevancia especial nos sectores da cultura e a educación como é o caso. Por iso é neceario ver o alcance das iniciativas e se están tendo o resultado que queremos.”
Museoloxía social encontro Pazo de Tor, visita Iria Castro / RMPL
A actividade forma parte da proxección externa da RMPL e segue o lema que o Consello Internacional de Museos (ICOM) determinou para o Día Internacional dos Museos de 2023, “Museos, sustentabilidade e benestar”. O obxectivo último sempre é ser o museo que se quere ser e que ten a museoloxía social como filosofía a seguir. O Museo Pazo de Tor segue converténdose así no espazo de referencia internacional sobre o tema, “Ao Pazo de Tor o MINOM (Movemento Internacional para a nova Museoloxía) dóalle o arquivo de todo o que supón a museoloxía social a nivel mundial, convértese así na sede do arquivo de MINOM a nivel internacional”, destacou Encarna Lago.
