Aseguran desde a plataforma que se a situación se estaba deteriorando dende hai anos, na última semana volve ser crítica. Entre os moitos problemas destacan, “as xubilacións, vacacións e baixas que non se cobren, sanitarios desbordados, pacientes que esperan citas de atención primaria durante semanas, citas que se cancelan, ou pacientes que acoden ao centro de saúde cunha cita e infórmanos que o seu médico ou enfermeiro de referencia non está e non serán atendidos”.

A plataforma Chantada Quere Sanidade e os veciños e as veciñas da vila entenden que esta situación non pode continuar, ao afectar á saúde xeral da poboación se non se toman medidas.

Na reunión deste mércores a plataforma deu conta das conversas que están mantendo con outros grupos a nivel nacional en defensa da sanidade, así como a recollida de milleiros de sinaturas. A este respecto sinalan que “lamentamos a negativa do alcalde de Chantada a asinar, a diferenza dos de Taboada e Carballedo que si asinaron.” Dende a coordinadora presentáronse diferentes medidas a levar a cabo nas próximas semanas para tentar reverter a “situación de desleixo actual”.

A primeira acción será unha concentración diante do Centro de Saúde, que terá lugar por segunda vez, o 2 de decembro ás 13h. “Convocamos, pois, a toda a cidadanía a asistir en defensa da sanidade pública porque Chantada e Carballedo meréceno e porque a Xunta debe entender que ser menos no rural non resta direitos”, conclúen desde a plataforma.