O Concello de Sober e as Xuventudes Musicais organizan esta proposta que achega ao Centro Sociocultural, “Souvenirs” en forma de canción, unha mostra da canción española e a mélodie française do XVIII e XIX, cando París era un dos centros mundiais da arte.
O concerto propón unha viaxe musical partindo da forte influencia do cabaret en Poulenc, continúase coa profunda obra de Duparc. Pasarase por compositores cataláns, Mompou e Montsalvatge, con este último reflectindo a presenza do colonialismo nas correntes artísticas a través das influencias antillanas. O programa péchase no último bloque cunha canción moi especial de Rodrigo, Adela, e culmínase coas 7 cancións populares, unha viaxe a través das raíces do folclore español construído maxistralmente por Falla.
Programa:
- Francis Poulenc: Les chemins de l’amour
- Henri Duparc: Chanson triste / Soupir / Au pays où se fait la guerre
- Cécile Chaminade: La lisonjera, op.50Frederic Mompou: Damunt de tu només les flors, de Combat del somni
- Xavier Montsalvatge: Cinco canciones negras
- Joaquín Turina: Dedicatoria, de Poema en forma de canciones op. 10
- Joaquín Rodrigo: Adela, de Doce canciones españolas
- Manuel de Falla: Siete canciones populares españolas
A soprano
A soprano segoviana, Aida Gimeno García, debuta recentemente no Palau da Música de Barcelona dentro do ciclo, O Primeiro Palau, obtendo o 2º accésit e o premio de Mocidades Musicais de Cataluña á mellor interpretación de compositor catalán. Protagonizou tamén en outubro de 2022 a produción central da tempada da Ópera de Vigo, interpretando o rol de Alice Ford en Falstaff. Durante a pasada tempada foi a única española invitada ao concurso internacional Operalia, celebrado en Moscova, e uniuse ao programa Crescendo para mozos cantantes, do Teatro Real de Madrid.
Formada no Conservatorio Superior de Salamanca e na Guildhall School of Music and Drama de Londres con Sarah Pring, durante este período debuta no Barbican Hall de Londres interpretando música checa de Dvorák. Entre 2019 e 2021 forma parte do Centre de Perfeccionament Plácido Domingo de Valencia onde ten a oportunidade de debutar roles como Vier Magd e Vertraute en Elektra, Delia en Il Viaggio a Reims, Alice Ford en Falstaff ou o papel protagonista de Violante en Il Tutore Burlato. Traballa con recoñecidos directores de escena como Robert Carsen, Emilio Sagi ou Damiano Michieletto e con directores de orquestra como James Gaffigan, Marc Albrecht ou Daniele Rustioni. Debuta como solista coa orquestra e coro da Comunitat Valenciana baixo a batuta de Michele Mariotti, interpretando o Gloria de Poulenc, con gran éxito de público e crítica.
