A organización “Mar de Lumes” vén de anunciar unha nova convocatoria para organizar concentracións en solidariedade co pobo palestino para o luns 11 de decembro. Este evento terá lugar, no caso da capital da Ribeira Sacra, ás 20:00 na Praza de España de Monforte de Lemos e baixo o lema “Paremos o xenocidio na Palestina”.
Dende a organización convocante afirman que “a situación en Palestina é motivo de preocupación a nivel global, mentres o estado de Israel non cese a súa criminal agresión e os nosos gobernos sigan a ollar para outro lado chamamos a continuar coa mobilización social e a denuncia do xenocidio co obxectivo xa declarado de anexar Gaza de maneira definitiva. Un xenocidio planificado que xa deixa decenas de millares de mortos, milleiros de nenos e nenas e destrución sen límites”.
MAR DE LUMES
“Mar de Lumes” é unha organización sen fins de lucro que promove a solidariedade e a conciencia social en temas globais. Traballamos para crear un mundo máis xusto e pacífico, e estamos comprometidos coa defensa dos dereitos humanos e a xustiza en todo o mundo.
