Desde a Asociación Veciñal do Saviñao aseguran, que tal e como se acordara na última reunión mantida co Alcalde, a asociación presentaría propostas concretas para humanizar o espazo entre a Biblioteca e o Auditorio de Escairón, co obxectivo de converter esa área en praza.

A Asociación considera que este espazo público está infrautilizado e pechado e propoñen diferentes actuacións: a retirada do peche de forxa para convertelo en espazo aberto, apertura do cancelo de aceso que está permanentemente pechado, colocar bancos e mesas móbiles para facilitar o multiuso, conectividade para acceso de medios de imaxe e son, adecentamento da pérgola do auditorio ou a súa retirada polo mal estado no que se atopa, pintar un mural no edificio da caldeira da calefacción, dotar o espazo de dous puntos de luz e facer unha limpeza periódica que garanta o mantemento deste espazo.