Pantón deu por iniciado o seu Nadal co alumeado de Nadal na capitalidade municipal, mentres asociacións e colectivos veciñais como “San Mamede de Mañente”, “Segredos de Pantón” ou “Tuiriz con U” levan tempo traballando na decoración das súas parroquias para estas festas.
A primeira cita da programación de Nadal de Pantón é este domingo 17 de decembro cun concerto do Grupo Folk de Ribas de Sil, a partir das 18:00h no salón de actos da Casa da Cultura de Pantón. A entrada é libre e gratuíta.
CONCURSOS
Por unha banda está o Concurso de Beléns para o que hai prazo aberto de inscrición ata o día 23 deste mes. O concurso está aberto á participación de asociacións, familias e persoas a nivel individual do municipio.
Para inscribirse cómpre facelo na casa da cultura en horario de 10.00 a 20.00 ou chamar por teléfono ao 982 45 63 77.
No mesmo lugar e horario pódense inscribir ata o 23 de decembro as nenas e nenos interesadas/os en presentar os seus traballos para o outro certame, o Concurso de Postais de Nadal. As postais deben de incorporar nome, apelidos e idade da/do participante na parte posterior.
PAPÁ NOEL E REIS MAGOS
Non faltarán ao Nadal de Pantón, Papá Noel e os Reis Magos. No acceso á Casa da Cultura, os/as nenos/as contarán coa Caixa do Correo na que deixar os seus desexos para este Nadal.
O día 5 de xaneiro de 2024 celebrarase o Festival de Reis a partir das 18.00 na Casa da Cultura. Alí, ademais doutras actividades lúdicas, entregaranse os premios dos diferentes concursos e as súas maxestades recibirán ás nenas e nenos que se acheguen a pedirlles os seus agasallos.
OBRADOIRO DE GALLETAS E DOCES DE NADAL
Os xoves pola tarde, desde medidos de outubro ata maio do 2024, unha quincena de pequenos/as participan do obradoiro Pequechef Pantón. En horario de 16:00 a 17:30 h. preparan deliciosos pratos, e esta semana elaboraron galletas e doces para o Nadal.
