Os socialistas de Chantada fanse eco do malestar da veciñanza ao respecto do pavillón municipal, “este 16 de decembro no encontro de baloncesto da Liga EBA entre o CB Chantada e o Estudiantes de Lugo, malia estar a temperatura exterior inferior a cinco graos, a calefacción non funcionaba e varias das fiestras do Pavillón están sen cristais dende hai meses, polo que a temperatura dentro das instalacións era similar á do exterior”.

O PSOE pide un consumo responsable da enerxía e ter xanelas con cristais. Lembran que nestas datas de Nadal están programadas no Pavillón unha serie de actividades dirixidas á infancia, como campamentos para axudar á conciliación das familias “e tendo en conta as temperaturas destes meses e o estado das instalacións, convértense nunha situación preocupante.”

Os socialistas instan ao concello a acometer de xeito urxente as reformas e reposicións que precisa o Pavillón para evitar situacións como as vividas a pasada fin de semana e para que se poidan desenvolver axeitadamente as actividades previstas nas instalacións.