Segundo os datos recollidos, o 45% dos visitantes dos centros xestionados pola Vicepresidencia da Deputación de Lugo chegaron desde distintos puntos de Galicia, mentras outro 45% procedían doutros puntos do Estado, maioritariamente de Madrid, Castela León e Andalucía.
As visitas internacionais supuxeron o 10% das persoas que se achegaron aos museos provinciais, destacando na listaxe de países de procedencia Estados Unidos, Reino Unido, Portugal, Alemaña, Arxentina ou Italia.
A deputada de cultura, Iria Castro, celebra estas cifras que supoñen un aumento de máis do 5% con respecto a 2022, cando se rexistraran 63.650 visitas, e valora o traballo do persoal dos museos “na conservación, estudo e promoción do patrimonio, cunha destacada actividade expositiva, centrada na arte galega contemporánea, e unha ampla axenda de actividades dirixidas a recoller e integrar a memoria de persoas anónimas na museoloxía, a través dun contacto estreito con distintos colectivos sociais”.
No Museo Pazo de Tor segue aberta a exposición temporal Historia do Futuro, ademais este pazo do século XVIII conserva os modos de vida da época e ofrece novos espazos expositivos como Soterradas, a Casa da Soga e Vida tralos Labirintos Mentais. O Museo Pazo de Tor ofrece visitas guiadas gratuítas sempre con cita previa ás 11:00, 12:30, 16:30 e 18:00.
Neste 2024, a Rede Museística Provincial acollerá do 3 ao 5 de xullo as Xornadas Internacionais sobre museos e educación, na que se exporán experiencias para a difusión de patrimonio e cumprimento dos dereitos culturais desenvolvidas nunha decena de museos do Estado entre os que figuran o Museo do Prado, o Museo Arqueolóxico ou o Museo de Altamira, o Museo do Pobo Galego ou o Museo de Pontevedra.
No encontro, con sede compartida entre os catro museos provinciais, daranse a coñecer materiais e estudos que se están a desenvolver nestes meses por parte dunha ampla rede de investigadores universitarios, profesorado de secundaria e xestoras de museos e que teñen como obxectivo promover mudanzas no enfoque da educación histórica con novas narrativas creadas a partir do patrimonio dos distintos museos.
