As bases do programa publicaranse este luns no Boletín Oficial da Provincia e o martes, 16 de xaneiro, abrirase o prazo para que as persoas interesadas poidan solicitar praza. Deberán cubrir un impreso que sairá no propio BOP e que tamén estará dispoñible na web da Deputación, e deberán presentalo en calquera rexistro oficial ou na sede electrónica da institución, xunto coa fotocopia do DNI.
Este ano, como novidade, o programa Lugo Termal contará con máis investimento, 91.000€, o que representa unha subida de case un 30% e máis prazas, 1.340 prazas, o que supón tamén un 30% máis. Desas prazas, 825 son con estancia e 515, sen estancia.
Co programa Lugo Termal, a Deputación ofrece descontos nos balnearios de Lugo, Pambre, Guitiriz e Pantón ás persoas maiores de 50 anos, que poderán acudir a estes establecementos cun acompañante que non teña necesariamente esta idade. Nesta nova edición, a número 12, os beneficiarios terán descontos de entre un 10 e un 20% en función da modalidade –con estancia ou sen estancia- e tamén, como en anos anteriores, haberá diferentes técnicas e tratamentos a disposición das persoas usuarias.
