Nun acto que tivo lugar este venres pola tarde na sede municipal da agrupación, as Xuventudes Socialistas constituíron a súa agrupación na vila. Esta constitución, contou cunha ampla presenza de militantes e cargos do PSdeG e das Xuventudes da provincia e doutras partes de Galicia como Lugo, Monterroso, Ourense ou Vigo.
Lara Méndez, candidata número 2 por Lugo e Vicesecretaria Xeral do PSdeG, resaltou a importancia de facer chegar a mensaxe do partido á mocidade e ás mulleres. Ela, que desempeñara o papel de Secretaria Xeral das XSG de Cervo, recordou a súa etapa na organización moza.
O Secretario Xeral das XSG, Xurxo Doval, destacou a necesidade nun cambio real das políticas da Xunta para dotar á mocidade do rural de “oportunidades reais” como, indica, “si fai a Deputación con José Tomé ou como fixo con Besteiro”. Ademais, quixo avanzar algunhas das medidas para o rural que as Xuventudes Socialistas presentarán nos vindeiros días, tales como a mellora da mobilidade ou un programa de loita contra o “sexilio” das persoas LGTBI.
Lucía Villamor, a nova Secretaria Xeral da Agrupación, pechou o acto destacando o ánimo do seu equipo para aportar todo o seu esforzo na mellora da vila da man do Concello e do PSdeG de Taboada. A súa Executiva estará composta por tres áreas máis: Organización e Acción Electoral, Política Municipal e Igualdade.
