Román Rodríguez, acompañado pola portavoz do PP de Monforte e candidata ao Parlamento de Galicia, Katy Varela e outros membros da candidatura, subliñou nunha visita á cidade do Cabe “o compromiso do PP co impulso da cultura e do ensino como polo tractor do desenvolvemento socioeconómico”. 

Os populares destacaron como “un claro exemplo” a rehabilitación do Colexio do Cardenal (A Nosa Señora da Antiga) cun investimento que acada os 800.000€ grazas ao cal se garante a conservación deste inmoble, tras a súa declaración como Ben de Interese Cultural BIC, por ser un dos máis senlleiros de Galicia e un reclamo turístico de primeira orde. Precisamente, a última actuación é a restauración do retablo da capela das Reliquias.

No eido das infraestruturas educativas, puxeron en valor as melloras en cinco centros de Monforte de Lemos como as do Instituto IES Río Cabe, a rehabilitación integral do Francisco Daviña Rey e as instalacións fotovoltaicas dos institutos A Pinguela, Río Cabe e o Centro de Educación Especial Infanta Elena que suman un investimento de máis de 2 millóns de euros.