A Asociación de empresarios e comerciantes do Xeoparque Montañas do Courel leva a San Clodio, capitalidade do Concello de Ribas de Sil, unha nova feira de oportunidades para darlle saída a moi bo prezo a produtos que teñen nos comercios. O lugar de encontro cos saldos será o pavillón municipal de San Clodio os días 2 e 3 de marzo.
Na feira poderase atopar roupa, calzado, libros, electrodomésticos e outros produtos como obxectos de agasallo, artesanía ou alimentación. Os postos de venda abrirán pola mañá, das 10:00 ás 14:00 h., e pola tarde, das 16:00 ás 20:00 h.
ACTIVIDADES PARALELAS
Para aqueles que vaian acompañados da cativada, a organización informa que haberá ludoteca pola tarde, tanto sábado como domingo de 16:30 a 18:30 horas.
E para adultos está programada a realización dun obradoiro de macramé, en horario de 11:00 a 14:00 horas pola mañá, e o sábado pola tarde, de 16:00 a 20:00 horas. Dende a asociación organizadora informan que este obradoiro será de nivel básico e consistirá na elaboración dun bolso. A persoa responsable do mesmo será Bibiana, da firma Nudito a Nudito.
