O Concello de Monforte vén de presentar o concurso para o cartel anunciador das Festas Patronais de 2024 do mes de agosto.
As bases, así como a convocatoria do mesmo, foron aprobadas na Xunta de Goberno celebrada o luns día 25 de marzo e xa se pode accedere a elas a través da páxina web do Concello de Monforte. O prazo para presentar os deseños orixinais queda aberto ata o 3 de maio de 2024, haberá un único gañador –que será o cartel anunciador e portada do programa das Festas– e o premio está dotado con 1.000 euros, impostos incluídos.
“Dende o concello animamos a todos os artistas a participar nesta convocatoria, para que nos axuden a acadar un bo cartel para as nosas Festas Patronais, que anime a todo o mundo a achegarse no mes de agosto a disfrutar delas, ensalzando así un evento que é moi importante para a nosa sociedade e para os nosos sectores económicos”, comentaba José Tomé na presentación do concurso á prensa.
O XURADO
O Xurado do concurso estará composto polas seguintes persoas:
PRESIDENTE: A Delegada-Concelleira de Cultura ou persoa á que designe.
VOGAIS: Persoas de diferentes ámbitos sociais, educativos e culturais de Monforte de Lemos.
SECRETARIO: O técnico de cultura do Concello de Monforte, con voz e sen voto, que certificará o cumprimento das condicións establecidas nas bases do concurso.
A decisión do xurado farase pública o luns 13 de maio de 2024.
CRITERIOS DE SELECCIÓN E PUNTUACIÓNS MÁXIMAS
Temática e relación coa cidade de Monforte e as súas festas: 30 puntos.
Mellor deseño gráfico: 30 puntos.
Tratamento das cores e tipo de letras: 20 puntos.
Diferentes usos do texto e das imaxes: 20 puntos.
Calidade técnica: 20 puntos.
Calidade artística: 20 puntos.
Impacto visual: 20 puntos.
Creatividade: 20 puntos.
Orixinalidade no deseño da montaxe: 20 puntos.
