A 20ª Feira Medieval terá lugar esta fin de semana, o 30 e 31 de marzo, contará coa colocación de 135 postos de alimentación, artesanía e comercio, unha cifra récord que supón todo un éxito de implicación e de interese por estar presentes neste magno escaparate; e tamén se poderá gozar dun completo programa de actividades continuas en diferentes espazos do casco histórico.
O rexedor monfortino destaca a participación deste ano no Concurso de Traxes Medievais, que se fallará na tarde do domingo 31, coa inscrición en adultos, de 12 parellas e 7 persoas en modalidade individual, e en infantil, con 1 grupo, 3 parellas e 3 en individual.
Ás 12 horas da mañá do sábado 30 de marzo un grupo de bufóns desenvolverá na Praza de España un espectáculo no que informarán do que acontecerá a fin de semana na cidade de Monforte, e daranlle paso ó Saúda do Alcalde, a través do cal declarará inaugurada a Feira Medieval.
O programa completo ao detalle pode consultarse na páxina web do concello.
FESTA DE INTERESE TURÍSTICO DE GALICIA
O Alcalde anima a participar indicando que “hai motivos de abondo para visitar Monforte” e resalta que “por fin, neste ano 2024 alcanzamos a edición número 20, e despois desta 20 edición, solicitaremos a declaración de Feira de Interese Turístico Galego, que esperamos ter recoñecida pola Xunta para a 21ª edición de 2025”.
