O Concello de Sober ultima xa os preparativos da XXII Festa das Avoas e dos Avós, que se celebrará a finais deste mes de abril, concretamente o día 27, no pavillón do CEIP Plurilingüe Virxe do Carme.

A esperada e concorrida cita dará comezo ás 13:30 horas cunha misa. A continuación haberá un xantar e non faltará a música. Como guinda, farase un sorteo de agasallos para todos e todas. O menú será a base de empanada, polbo, carne asada, rosca de Millán e queixo, café e bebidas.

O prezo para asistir é de 10 euros para empadroados e 20 euros para as persoas non empadroadas e o concello poñerá servizo de transporte para aquelas persoas que o precisen.

Dende a organización piden confirmación da asistencia antes do 24 de abril chamando aos teléfonos seguintes: 982 46 00 01 / 982 46 05 13.