O pasado mes de decembro, a entón directiva da Asociación Chantada Contra o Cancro anunciaba a súa decisión de rematar a súa etapa. Abríase a posibilidade de que esta organización chantadina desaparecese logo de 7 anos –fundouse en decembro de 2016– se ninguén collía as rendas. Por sorte, unha nova directiva comprometíase a continuar este interesante e necesario proxecto a comezos deste ano.
A entidade chantadina naceu para compartir experiencias, apoiar a doentes e ás súas familias e promover hábitos de vida saudables. “O importante labor que comezara da man de Jesusa –a primeira presidenta e fundadora da asociación– e que serviu de axuda para moitos doentes e familias, para ir rompendo o tabú que aínda existe arredor do cancro e, sobre todo, facelo dende unha localidade pequena e rural onde o acceso a calquera servizo é máis complicado, non podía perderse”, afirman dende a nova directiva.
A actual directiva, que afirma ter “unha vontade continuista, seguindo co bo facer da asociación”, está conformada por catro mulleres: Ana López (Presidenta), Salud Sánchez (Tesoureira), Elena Pavón (Secretaria) e Eva R. Argiz (Vogal).
ACTIVANDO ACTIVIDADES NESTE 2024
O pasado mes de marzo celebraron un concerto solidario de acordeón e pouco despois organizaron charlas nos dous institutos chantadinos (Lama das Quendas e Val do Asma) sobre as enfermidades de transmisión sexual (ETS), especialmente o virus do papiloma humano (VPH) e a súa relación co cancro. A xinecóloga e tamén chantadina, Dra. Ana Casal, foi a encargada de impartilos. “A nosa vontade non é outra que os rapaces e rapazas conten con toda a información dos riscos e de como poden previlos”, explican dende o colectivo xustificando o importante labor divulgativo que teñen este tipo de actividades.
Pensando xa no futuro próximo, avanzan que xa haberá unha actividade para o mes de xuño e que están preparando a súa tradicional Andaina.
IMPLICACIÓN CON PACIENTES DE CANCRO
Ademais do eido divulgativo, Chantada Contra o Cancro tamén se implica co paciente. Coa colaboración de profesionais e establecementos locais, ofrecen servizos para socios, doentes e familiares. Eses servizos son: atención psicolóxica, asesoramento nutricional, neuroterapia, actividade física e mantemento de próteses capilares.
Estes servizos conseguen que os doentes e familias chantadinas e da comarca, “poidan ter as mesmas oportunidades de servizos de apoio que noutros lugares ou cidades, e cun prezo reducido grazas á aportación que se fai tanto dende a asociación como dos propios profesionais que colaboran connosco”, explican dende a directiva da asociación.
O teléfono de contacto da asociación é o seguinte: 641 45 27 42.
