Segundo os populares, nos últimos plenos, a preguntas do Grupo Popular, o alcalde asegurou que Monforte estaría desbrozado ao remate de xuño pero “non moveu nin un dedo”.
A voceira popular, Katy Varela, explica que “xa estamos en pleno verán e con temperaturas en Monforte que superan practicamente a diario os 30º, polo que esta debería ser unha das preocupacións do alcalde, por seguridade para evitar posibles incendios”.
Neste senso, os concelleiros populares estiveron recentemente en Piñeira, tras recibir queixas dos veciños por diferentes eivas como que a zona peonil da estrada principal, de titularidade da Deputación Provincial de Lugo, “está sen desbrozar, ocupando a maleza a beirarrúa e a beiravía, impedindo o paso dos peóns nunha parroquia moi poboada e moi próxima a unha zona escolar e deportiva”.
Nunha situación semellante están moitas outras parroquias polo que “agardamos que nos próximos días o alcalde corrixa esta situación xa que mantén Monforte nun estado de abandono que non imos a permitir”.
Varela explica tamén que defenderon no pleno un rogo para habilitar prazas de estacionamento temporal nas proximidades das farmacias para que os seus usuarios teñan garantido unha praza para aparcar cando precisan ir a un destes establecementos a mercar medicamentos. “A sorpresa foi que o equipo de goberno desestimou esta petición, pero si que lle pareceu acaído aprobar a instalación de cámaras nas rúas e zonas peonís para controlar o acceso, amosando un claro afán recadatorio”, conclúen desde o PP.