A organización do Trece Roeis Fest, tras anunciar a volta deste festival sen ánimo de lucro da Ribeira Sacra para os días 30 e 31 de agosto, comparte o derradeiro avance de cartel que inclúe unha importante aposta pola música feita en Galicia así como a chegada da primeira actuación internacional.
No seu quinto aniversario, a organización do festival que mantén o seu compromiso coa música e os grupos galegos, amplía o cartel tanto en número de actuacións como na procedencia dos artistas.
Neste sentido, o cartel complétase coa artista chilena, Ana Tijoux, que co seu hip-hop colorido e fusionado amosa un grande compromiso político e social. Ela conta cun Latin Grammy (2014) pola canción Universos Paralelos na que colaborou co uruguaio Drexler e o Premio Altazor (2012) así coma diversas nominacións aos Grammy, MTV Awards ou MTV Music Awards, entre outros.
A Tijoux tamén se lle une a banda de Reggae e Dancehall Green Valley, que tras xirar por España, Colombia, México, Arxentina ou Chile traen a súas letras positivas e reivindicativas ao escenario do Trece Roeis Fest 2024.
Con 7 discos ás súas costas, os valencianos Los de Marras e o seu autoproclamado “guarrocanrol” son outra das últimas confirmacións deste festival. Tamén con moita historia e tendo acompañado ao Trece Roeis Fest noutras dúas ocasións con Heredeiros da Crus (en 2019 e 2022), chega coa súa aposta en solitario Javi Maneiro.
Xunto con estas últimas confirmacións tamén chegan as de Baturruka, a batucada da capital da comarca da Terra de Lemos, o concerto punkinfantil de Peter Punk e Brais Hortas, sesión DJ e a actuación do Mago Teto.
Estas son as 8 actuacións que pechan o cartel musical do 5º aniversario, xunto coas xa confirmadas e que son: Soziedad Alkoholika, Sôber coa súa xira 30 aniversario xunto con Savia e Skizoo, Fillas de Cassandra, Rebeliom do Inframundo, Arrhythmia, Pauliña, Xabier Vizcaíno, Festicultores Troupe, TIAM Gz, Amoebo e Exeria.
A organización indica que a venta de entradas está habilitada a través da súa páxina web www.treceroeisfest.com e, coma outros anos, nos vindeiros días compartirán máis información co resto de actividades e novas desta edición.
