Na XXXVI Cata dos Viños de Galicia recibiron na D.O. Ribeira Sacra, Acio de Ouro Branco, Viña Vella de SAT Virxe dos Remedios e Acio de Ouro Tinto, Casa Moreiras de Casa Moreiras S.L.
Dentro dos viños de elaboracións con madeira recibe Acio de Prata Tinto, Quitapesares Adega Vella de Adega Vella Xeracións S.L.
Na semana na que se coñeceron os premios aos mellores viños de Galicia o crítico, Joaquín Hidalgo, editor para Sudamérica e España en Vinous.com, visitou a Ribeira Sacra, explorando viñedos e adegas. Tamén coñeceu o Consello Regulador da Denominación de Orixe Ribeira Sacra onde realizou unha cata. Hidalgo expresou a súa admiración pola riqueza histórica e a diversidade da Ribeira Sacra. Resaltou o valor das variedades de cepas históricas da rexión, comentando: “Esta é unha rexión que ten moita historia como para acoutar o seu rexistro varietal. Apostar por un corazón de mencía e outras variedades que completen parece unha moi boa idea. E despois, se queres, podes completar con outras variedades, como viños cen por cento brancellao, que é o que a min me sorprendeu en termos de estilo de viño e dálle outra profundidade, ábreche outras propostas”.
Con unha sólida formación en Enoloxía e Xornalismo, Joaquín Hidalgo combina o seu coñecemento técnico cunha paixón pola comunicación. Residente en Bos Aires, Hidalgo escribe sobre viño e gastronomía para varios medios e é co fundador de vinomanos.com, a primeira guía móbil de viños arxentinos. A súa colaboración en Vinous.com, unha das publicacións de viños máis influentes e respectadas a nivel mundial, permítelle proporcionar reseñas e novas sobre os lanzamentos das principais rexións vinícolas do mundo.
Ademais, subliñou que o desafío na Ribeira Sacra non é vitícola, senón enolóxico, mencionando que grazas a ideas tanto locais como foráneas, atopou viños “con maior fineza pero reflectindo rusticidade ben traballada”. Para concluír, Hidalgo indicou que o reto futuro da Ribeira Sacra radica en construír unha imaxe sólida a nivel internacional. Dada a gran diversidade e a presenza de pequenos produtores, é crucial atopar unha identidade coa que a rexión poida presentarse ao mundo.A visita de Joaquín Hidalgo á Ribeira Sacra non só destaca a calidade e a diversidade dos seus viños, senón tamén o compromiso da rexión coa tradición e a innovación enolóxica
