Os concertos do Escenario Chantada levaranse a cabo no Parque Eloísa Rivadulla, “en Chantada colaboramos con Festival 17º desde a segunda edición. O Festival caracterízase por acoller concertos e outras actividades en espazos singulares da Ribeira Sacra. Nós viñámolo celebrando na Praza do Cantón e este ano levámolo a outro enclave singular, o Parque Eloísa Rivadulla. O cambio faise necesario por cuestións loxísticas ao coincidir coa Subida a Chantada, que neste 2024 celebra medio século”, explica o alcalde de Chantada, Manuel Lorenzo Varela.
Despois de que Catuxa Salom e Jimena Amarillo actuaran o pasado ano en Chantada dentro do 17º; neste ano, a vila do Asma protagoniza o último día de Festival, o 28 de xullo, con dous interesantes concertos. Ás 13:15h, actuará De Ninghures, concerto Cervezas Alhambra, “A opción para calquera que busque unha experiencia única. O inicio do grupo remóntase ao 2022 co lanzamento do seu primeiro álbum titulado “Aquí”. Agora co seu último debut “Poço”convértense en referente do xénero fresh trad galego” recolle a web do Festival.
Ás 14:20 actuará Mondra, artista, cantante e bailador, vinculado á música e ao baile tradicional galego, así como ao teatro e ao audiovisual. No 2023 publica Ardén (Altafonte Music Spain), o seu primeiro traballo discográfico producido por Berto.
O Concello de Chantada colabora co 17º pola promoción turística que fai da Ribeira Sacra e en particular de Chantada, “É un festival importante con moita difusión que despois se presenta a concursos nacionais e internacionais e gáñaos aparecendo o nome de Chantada aí. Agora forma parte do colectivo Festivales Territorio con outras citas singulares que se fan no resto do Estado. Gústanos o formato do Festival que non está masificado e pon o foco na cultura e no patrimonio”, destaca o alcalde.
Os concertos do Festival 17º son de pago, pero no caso dos concertos de Chantada son gratuítos para a xente do municipio. Hai que recoller a entrada na Oficina de Turismo a partir deste venres e ata o 25 de xullo, xustificando estar empadroado/a no municipio. O Festival 17º, que organiza I-Radia Crea, presentouse este mércores no Balcón Enoturismo de Regina Viarum, no Concello de Sober, coa participación entre outras autoridades do concelleiro de Parques e Xardíns de Chantada, Diego Otero.
Concertos, arte e degustacións do 17º
No escenario FEST Galicia actuarán algúns dos cabezas de cartel desta oitava edición do 17º Ribeira Sacra, como o grupo inglés Morcheeba, a catalá Queralt Lahoz, os alemáns Say Yes Dog e o músico irlandés-iraní Glassio, xunto ás propostas galegas de Faneka e de Carlangas y Los Cubatas. No resto dos escenarios, a programación de bandas galegas complétase cos concertos de Mondra e De Ninghures aos que se suman artistas do panorama estatal como The Parrots e Doctor Explosión.
Ademais, o festival volve brindarlle ao público experiencias gastronómicas, culturais, paisaxísticas e etnográficas intimamente vencelladas á idiosincrasia da Ribeira Sacra. Haberá concertos en catamarán, rutas polas adegas, catas de produtos gastronómicos e vitícolas, conversas sobre arte e a exposición Artes líquidas, da luguesa Annita Rivera. No referente á gastronomía, nesta edición a selección de pratos para degustación estará elaborada polo restaurante O Casar de Monforte de Lemos, co chef Rafa Centeno á fronte desde as cociñas de Vértigo, o restaurante de Regina Viarum.
Presentación 17º 2024 / Consellería de Cultura
