Unha sesión vermú, de 13.00 a 15.00 horas, será o aperitivo do festival, con actuacións de Grande Amore, Carlangas, DJ Grande Osso, Louband e Futuro Alcalde -a partir das 19.00 horas -na terraza do Meigallo.

O acto de presentación tivo lugar no propio establecemento coa presenza do delegado territorial de Lugo, Javier Arias, a directora territorial de Emprego, Comercio e Emigración, Carmen José López, o vicepresidente da Deputación de Lugo, Efrén Castro, entre outros.

Arias destacou que a proposta “estase a consolidar como unha das citas de música indie máis importantes da provincia” e gabou a súa aposta polos artistas galegos.

Castro amosou o apoio da Vicepresidencia da Deputacion ao festival organizado pola Asociación Verbam, “unha mostra máis do dinamismo da mocidade e do tecido asociativo de Sarria, que enche a vila de actividade musical e cultural” e encadrou a colaboración “no apoio que as áreas da Vicepresidencia ofrecen ao tecido asociativo, ao tempo que se impulsa a presenza de bandas galegas en festivais e citas musicais do territorio”.

As persoas interesadas aínda poden adquirir entradas a través dos enlaces para compra en liña dispoñibles nas redes sociais do festival.