Alberte Montes estará este venres, 9 de agosto, ás 22:00 na Praza do Concello de Pantón, e o sábado 10 ás 20:00 h. no Centro Social de San Xoán de Río. Neste último concello chega a través do circuíto REAOU (Rede de Auditorios Provincial de Ourense) que cofinancia a Deputación de Ourense.
Patrón é un espectáculo moi especial. Unha homenaxe a esa figura icónica da cultura popular galega. Ese cabeza de familia, xefe da cuadrilla, ese pureta que se cre máis e con máis poder do que en realidade ten.
Alberte vaise facendo maior e cre estar entrando nun proceso de “empatronamento”. Tics, manías, xeitos de facer estanlle marcando o camiño. A súa vida cambiou un chisco nos últimos tempos. Vai quedando atrás o Alberte mozo, que saía un martes e non tiña resaca o mércores, que durmía máis cas mantas ou que non tiña que preparar o IVA trimestral.
Neste espectáculo, Alberte tamén renderá tributo ó patrón de referencia, seu pai.
Alberte, actor e humorista
Alberte é actor e cómico. Como cómico supera as 1.000 actuacións en directo e colocou varios monólogos para CENTRAL DE CÓMICOS, formato de moda hai anos en Comedy Central. Ten actuado xunto a cómicos coma Ignatius, Toni Moog ou Carlos Blanco.
Colaborou en programas de humor como BUENAS NOCHES Y BUENAFUENTE ou EN EL AIRE de El Terrat, e outros da TVG, entre os que destacan LAND ROBER ou LUAR.
Na súa faceta de colaborador e reporteiro participou dos programas LOS LUNES AL GOL e LOS INFILTRADOS ámbolos dous da canle Gol TV, e na Cadena SER. Actualmente colabora cunha sección semanal nun programa de Ràdio 4, de RNE en Catalunya.
Na Televisión de Galicia protagonizou series de comedia como DO DEREITO E DO REVÉS e AUGASQUENTES e foi un dos protagonistas de FARIÑA (Netflix/Antena3). Interveu ademais en VIDA PERFECTA ou MATAR AL PADRE, ámbalas dúas de Movistar+. E tamén formou parte do elenco de EL PUEBLO (Amazon/Telecinco) en 2 tempadas.
Alberte tamén traballa como presentador, guionista, director, creativo publicitario e locutor. Nesta última faceta salientar o Podcast ‘Bueno Carallo Bueno’ que saca adiante xunto co politólogo Silvio Falcón.
