Tras a convocatoria realizada pola Anpa do CEIP de San Clodio, no Concello de Ribas de Sil, o pasado 16 de agosto achegáronse á mobilización de protesta unhas cen persoas, a maioría delas familias con nenos e nenas escolarizadas neste centro de ensino.
O motivo da concentración foi amosar o descontento coa medida da Consellería de Educación da Xunta de Galicia de agrupar o vindeiro curso a alumnado de diferentes idades en só dúas aulas, acción de recorte que supón quedar cun profesor menos no devandito CEIP.
Segundo a Anpa, nunha aula estarán os de primero, segundo e terceiro de Primaria, e noutra os de cuarto, quinto e sexto. Este mesmo colectivo avanza que farán máis mobilizacións en caso de que non se atendan as súas demandas.
Esta queixa pública súmase á realizada ante a Xefatura Territorial de Educación sen, polo que sabe este medio, houbese resposta ás peticións trasladadas polo colectivo escolar do CEIP de San Clodio.
Ademais da veciñanza, familias e alumnado do centro afectado, participaron na concentración de protesta polo recorte dun mestre: o Alcalde de Ribas de Sil, Miguel Ángel Sotuela; concelleiros do seu equipo de Goberno; o concelleiro de Quiroga, Xosé Manuel Fernández; e o deputado do BNG por Lugo, Iago Suárez.
Como curiosidade salientar a chegada dun grupo de nenos e nenas de Casares, aldea que non conta con ningún escolarizado a día de hoxe, para participar na protesta con varias pancartas de apoio. Estaban de vacacións no lugar e sumáronse á causa.
