O Club Deportivo Korbis naceu no 2013 ao redor dun grupo de xente que organizaba o Torneo de Volei Praia no parque dos condes, evento do que xa temos informado neste medio, coa colaboración do concello de Monforte de Lemos. O grupo foi medrando e creando diferentes categorías deportivas sendo na actualidade unha entidade que conta cada día con máis deportistas nunha fronte común, a práctica do deporte.

Este sábado foi un día de intensa actividade para o Korbis pois disputaron 10 partidos, tiveron a presentación oficial o sábado pola tarde no Pavillón Polideportivo da Pinguela e unha cea de confraternización.

Na presentación das diferentes categorías estivo presente o alcalde de Monforte, José Tomé, que amosou o seu apoio e posou tamén nalgunha das fotos oficiais.

Responsables do club aproveitaron a ocasión tamén para agradecer o esforzo das familias, o apoio do alcalde e dos directores de centros educativos e o labor das casas comerciais monfortinas que apoian economicamente o proxecto co seu patrocinio.