Este martes, 3 de setembro, comezaron as obras de mellora nunha das vías urbanas da cidade do Cabe, a rúa Santiago, no Barrio do Casar. Para poder levar a cabo as actuacións, o Concello adquiriu os terreos necesarios. O proxecto de mellora da rúa Santiago, conleva a reposición do seu firme nun tramo de 340 metros lineais por 5,97 metros de ancho medios, o que supón unha superficie de 2.030 metros cadrados. 

No tramo central onde a vía é máis estreita, existe un peche dunha parcela que se mete dentro da aliñación que definen os outros peches. Por iso, previo ó inicio das obras, o Concello de Monforte, procedeu a regularizar esa aliñación, ocupando parte desa parcela (32m2). Procederase á demolición do peche actual e á construción dun novo.

É necesario, así mesmo proceder ao fresado do entroncamento inicial e unha zona na parte central, previamente á colocación da nova capa de rodadura de aglomerado en quente. Na parte final, antes do entroncamento coa rúa Chantada, rebaixarase a rasante da vía uns 10 centímetros para evitar a entrada de auga en varias entradas de garaxes alí existentes. Remtatarase coa colocación da nova capa de rodadura de aglomerado en quente e co posterior recalce das tapas existentes.

O alcalde, José Tomé, subliña que esta acción enmárcase dentro da súa folla de ruta para “a mellora do urbanismo da nosa cidade, e por iso nestes últimos 8 anos transformamos todos os barrios de Monforte”. De feito, a rúa Santiago era case a única rúa periurbana sen asfaltar.