O Sindicato Labrego Galego-Comisións Labregas (SLG-CCLL) mantén a convocatoria de mobilización para este venres, 13 de setembro, ás 11.30h., diante das dependencias da Consellaría do Medio Rural (CMR) en Lugo (Xunta de Galicia, Ronda da Muralla, 70).
A Consellería de Medio Rural acaba de convocar ás organizacións agrarias a unha mesa de traballo para o vindeiro 18 de setembro, cita á que o SLG anuncia que acudirá, pero mantén aínda así a convocatoria de mobilización, “a demora na proposta de xuntanza e a lentitude na vontade de reacción e actuación por parte da Xunta de Galicia segue xustificando que o sector se manteña mobilizado se queremos que da xuntanza do vindeiro mércores saiamos ca solución que precisamos xa para esta vendima”.
Esa solución pasaría, segundo o sindicato pola axuda directa para as viticultoras e viticultores aos que non se lles vai recoller a uva e unha proposta clara de actuación que evite que esta situación, como xa vaticinan as propias adegas da Ribeira Sacra, se repita de novo o vindeiro ano.
Desde o sindicato consideran que as medidas que ten anunciado a Consellería son insuficientes e que se concretarían despois de meses de ter rematado a vendima, polo que coa concentración deste venres demandarán, “que a Consellería de Medio Rural tome medidas realmente efectivas para que os viticultores e viticultoras ás que lles quede a uva sen recoller teñan unha compensación económica que cubra, como mínimo, os custos de produción nos que incorreron durante todo o ano”.
